ဘင်္ဂလားဒေ့ရှ်နှင့် မြန်မာနိုင်ငံအကြား နယ်နိမိတ်ဖြစ်သော နတ်မြစ် (Naf River) အတွင်း လှေတစ်စင်း တိမ်းမှောက်ခဲ့ရာမှ ရိုဟင်ဂျာ အနည်းဆုံး ၉ ဦး ပျောက်ဆုံးနေဆဲဖြစ်ကြောင်း ဘင်္ဂလားဒေ့ရှ် အာဏာပိုင်များက ပြောကြားသည်။
လှေပေါ်တွင် လိုက်ပါလာသူများသည် မြန်မာနိုင်ငံ ရခိုင်ပြည်နယ်အတွင်း မြန်မာစစ်တပ်နှင့် အာရက္ခတပ်တော် (Arakan Army – AA) တို့အကြား ဆက်လက်ဖြစ်ပွားနေသည့် တိုက်ပွဲများမှ ထွက်ပြေးလာသူများဖြစ်နိုင်ကြောင်း ရဲတပ်ဖွဲ့က ပြောသည်။
အနီးအနားတွင် ငါးဖမ်းနေသော ဘင်္ဂလားဒေ့ရှ် ငါးဖမ်းသမားများက လှေမြုပ်နေသည်ကို တွေ့ရှိပြီး ၁၈ ဦးကို အသက်ရှင်လျက် ကယ်ဆယ်နိုင်ခဲ့ကြောင်း သိရသည်။ ကယ်ဆယ်ခံရသူများကို နောက်ပိုင်းတွင် ဘင်္ဂလားဒေ့ရှ် နယ်ခြားစောင့်တပ် (Border Guard Bangladesh (BGB) ထံ လွှဲပြောင်းပေးခဲ့သည်။
တက္ကနာဖ် ရဲစခန်းမှ တာဝန်ခံအရာရှိ ဆိုင်ဖူလ် အစ္စလာမ် က “လက်ရှိအချိန်ထိ လူကိုးဦး ပျောက်ဆုံးနေဆဲဖြစ်ပါတယ်” ဟု AFP သတင်းဌာနသို့ ပြောကြားခဲ့သည်။
ဒေသခံ ရာရှစ် အာမက် က လှေသည် မြစ်ရေစီးသန်ခြင်းနှင့် လှိုင်းကြီးခြင်းကြောင့် ထိန်းချုပ်မှုဆုံးရှုံးကာ တိမ်းမှောက်ခဲ့ခြင်းဖြစ်ကြောင်း ပြောသည်။
“အနီးအနားက ငါးဖမ်းလှေတွေ အမြန်ရောက်လာပြီး ရေနစ်နေသူတွေကို ကယ်ဆယ်ခဲ့ပါတယ်။ ကယ်တင်ခံရသူ ၁၈ ဦးထဲမှာ လှေမောင်းသူနဲ့ သူ့ရဲ့ အဖော်လေးဦးလည်း ပါဝင်ပါတယ်” ဟု ၎င်းက ဆိုသည်။
ရခိုင်တိုက်ပွဲများကြောင့် ရိုဟင်ဂျာများ ဆက်လက်ထွက်ပြေးနေ
ယခုဖြစ်ရပ်သည် ရခိုင်ပြည်နယ်တွင် တိုက်ပွဲများ ပြင်းထန်လာမှုကြောင့် ရိုဟင်ဂျာအရပ်သားများ ဆက်လက် နေရပ်စွန့်ခွာနေရသည့် လူသားချင်းစာနာထောက်ထားရေး အကျပ်အတည်းကို ထပ်မံထင်ဟပ်စေသည်။
၂၀၂၁ ခုနှစ် မြန်မာစစ်အာဏာသိမ်းမှုနောက်ပိုင်း ရခိုင်ပြည်နယ်တွင် စစ်ကောင်စီနှင့် အာရက္ခတပ်တော် (AA) တို့အကြား တိုက်ပွဲများ ပိုမိုကျယ်ပြန့်လာခဲ့ပြီး ရိုဟင်ဂျာအပါအဝင် ဒေသခံအရပ်သားအများအပြားမှာ လုံခြုံရေးအတွက် နယ်စပ်ဖြတ်ကျော် ထွက်ပြေးနေရသည်။
အန္တရာယ်များသော ရေကြောင်းခရီးစဉ်များ ဆက်လက်ဖြစ်ပေါ်
လက်ရှိတွင် ဘင်္ဂလားဒေ့ရှ်နိုင်ငံ ကော့ဘဇားရှိ ဒုက္ခသည်စခန်းများတွင် ရိုဟင်ဂျာ တစ်သန်းကျော် နေထိုင်လျက်ရှိပြီး အများစုမှာ ၂၀၁၇ ခုနှစ် မြန်မာစစ်တပ်၏ စစ်ဆင်ရေးနောက်ပိုင်း ထွက်ပြေးရောက်ရှိလာသူများဖြစ်သည်။
နိုင်ငံတကာ လူသားချင်းစာနာထောက်ထားရေး အဖွဲ့အစည်းများက အကူအညီရန်ပုံငွေ လျှော့ချမှုများကြောင့် ဒုက္ခသည်စခန်းများအတွင်း စားနပ်ရိက္ခာမလုံလောက်မှု၊ အာဟာရချို့တဲ့မှုနှင့် အသက်မွေးဝမ်းကျောင်း အခက်အခဲများ ပိုမိုဆိုးရွားလာကြောင်း သတိပေးထားသည်။
ထိုအခြေအနေများကြောင့် ရိုဟင်ဂျာအများအပြားသည် လူကုန်ကူးကွန်ရက်များ အသုံးပြုသည့် အန္တရာယ်များသော လှေများဖြင့် ပင်လယ်နှင့် မြစ်ကြောင်းခရီးစဉ်များကို စွန့်စားသွားလာနေရဆဲဖြစ်သည်။
ကုလသမဂ္ဂ၏ အချက်အလက်များအရ လွန်ခဲ့သည့် ဆယ်စုနှစ်အတွင်း ဘင်္ဂလားပင်လယ်အော်နှင့် အန်ဒမန်ပင်လယ်တို့ကို ဖြတ်သန်းသည့် အန္တရာယ်များသော ရေကြောင်းခရီးစဉ်များတွင် ရိုဟင်ဂျာ ၅,၀၀၀ ကျော် အသက်ဆုံးရှုံးခဲ့ကြောင်း သိရသည်။
လက်ရှိအချိန်အထိ ပျောက်ဆုံးနေသူများ၏ အတည်ပြုအချက်အလက်များကို ဘင်္ဂလားဒေ့ရှ် အာဏာပိုင်များက ထုတ်ပြန်ခြင်းမရှိသေးဘဲ ရှာဖွေကယ်ဆယ်ရေးလုပ်ငန်းများ ဆက်လက်လုပ်ဆောင်နေသည်။
